ABŞ səfirliyinin maşını qəzaya düşdü: ölən və yaralı var - FOTO - YENİLƏNİB

ABŞ-ın Azərbaycandakı səfirliyinin avtomobili Bakıda qəza törədib. “Report”un xəbərinə görə, səfirliyə məxsus “Chevrolet” markalı avtomobil motosikletlə toqquşub. Hadisə nəticəsində motosikletdə olan bir nəfər ölüb, digəri yaralanıb. Onların şəxsiyyəti hələ ki, məlum deyil. Qəza ABŞ-ın Azərbaycandakı səfirliyinin qarşısında (Azadlıq prospekti-111) baş verib. Əraziyə hüquq-mühafizə orqanlarının əməkdaşları gəlib.

***

APA-nın məlumatına görə, qəza  “Honda” markalı motoskletin arxadan “Shevrolet” markalı maşına çırpılması nəticəsində baş verib. “Shevrolet” ABŞ-ın Azərbaycandakı səfirliyinə məxsus olub.  Motoskletdə olan kişi sürücü ağır yaralanıb, onun sərnişini Nərmin Əliyeva isə hadisə yerindəcə ölüb. Motoskletin sürücüsü, 1993-cü il təvəllüdlü Qurbanlı Hüseyn Qurban oğlu isə ağır bədən xəsarətləri ilə Klinik Tibbi Mərkəzə yerləşdirilib. Nəsimi rayon Polis İdarəsinin müstəntiqi Cövdət İsgəndərov  deyib ki, hadisə iki motoskletin bir-biri ilə ötüşməsi nəticəsində baş verib: "Əvvəlcə motoskletlər bir-biri ilə toqquşub, onlardan biri zərbədən idarəetməni itirib və maşına çırpılıb, digəri isə hadisə yerindən qaçıb".