Ana öldü, ata və azyaşlı övladı yaralandı - VİDEO

Abşeron rayonu ərazisində 1 nəfərin ölümü, 3 nəfərin xəsarət alması ilə nəticələnən ağır yol-nəqliyyat hadisəsi baş verib. Yol qəzası Sumqayıt-Müşfiqabad yolunda qeydə alınıb. APA TV-nin məlumatına görə, yolla qarşı-qarşıya gələn "VAZ-21099" və "Nissan" markalı avtomobillər toqquşub. "VAZ-21099"-da bir ailənin üzvləri - ər, arvad və onların azyaşlı övladları olub. Qəza nəticəsində ata və azyaşlı uşaq xəsarət alıb, qadın isə ölüb. Avtomobil deformasiyaya uğradığından, həlak olan 32 yaşlı Əliyeva Ceyhunə Mustafa qızının meyitini çıxarmaq mümkün olmayıb. Hadisə ilə bağlı Fövqəladə Hallar Nazirliyinin “112” qaynar telefon xəttinə məlumat verilib. Hadisə yerinə FHN-in Xüsusi Riskli Xilasetmə Xidmətinin əməkdaşları cəlb ediliblər. Onlar xüsusi kəsici alətlərdən istifadə etməklə 32 yaşlı qadının sıxılmış vəziyyətdə qalmış meyitini çıxarıblar. Xəsarət alanlar isə təcili tibbi yardım briqadası tərəfindən xəstəxanaya çatdırılıb. Qəza zamanı "Nissan"ın sürücüsü də yüngül xəsarət alıb.

Faktla bağlı Abşeron Rayon Polis İdarəsində araşdırmalara başlanılıb. İstintaqçılar hadisə yerini müayinə ediblər, qəzanın dəqiq səbəbinin müəyyənləşdirilməsi üçün avtotexniki ekspertiza təyin edilib.

İlkin ehtimala görə, qəzaya yüksək sürət səbəb olub.