Hava limanı yolunda kobud qayda pozan sürücü avtomobili vurdu; ziyanı ödəmədi - VİDEO

Paytaxtın Hava Limanı yolunda kobud qayda pozaraq qəza törədən sürücü avtomobilin kamerasına düşüb.

Avtosfer.az-ın “Whatsapp” ünvanına göndərilən videomaterialdan məlum olub ki, hadisə yanvarın 1-də saat 18:03 radələrində qeydə alınıb. Kadrlardan görünür ki, 77-LC-875 dövlət nömrəli “Hyundai” markalı avtomobilin sürücüsü manevr qaydasını pozub. O, sağ zolaqda hərəkət edən avtomobili nəzərə almadan zolaq dəyişib və bu zaman görüntünü qeydə alan avtomobili vuraraq yoluna davam edib. Zərərçəkmiş bildirib ki, qəzaya səbəb olan sürücü maddi ziyanı qarşılamadan hadisə yerini tərk edib.

Qeyd edək ki, belə hallarda sürücülərin qayda pozuntusu yalnız digər avtomobillərə maddi ziyan yetirmək deyil, həm də yol-nəqliyyat təhlükəsini artırır. Zolaq qaydalarına riayət etmək, qəza anında dayanmaq və zərərin ödənilməsini təmin etmək sürücülərin və digər yol iştirakçılarının təhlükəsizliyi üçün önəmlidir.

Nərmin