Magistralda ağır qəza: ana və qızı yaralandı

Kürdəmir rayonunda iki nəfərin xəsarəti ilə nəticələnən yol qəzası baş verib. Avtosfer.az-ın APA-ya istinadən verdiyi xəbərə görə, hadisə bu gün səhər saat 07:30 radələrində Bakı-Qazax əsas magistral yolunun Kürdəmir rayonunun Sığırlı kəndi ərazisindən keçən hissəsində qeydə alınıb. Elnur Heydərovun idarə etdiyi “Mitsibushi” markalı maşınla Elşən Şükürovun idarə etdiyi “Mercedes” markalı minik maşını toqquşub. Nəticədə “Mercedes”də olan sərnişinlər - Yevlax rayon sakinləri, 63 yaşlı Əhmədova Südabə Sadıq qızı və onun qızı 37 yaşlı Davudova Gülnur Məqsəd qızı müxtəlif bədən xəsarətləri alıb. Onlar Kürdəmir Mərkəzi Rayon Xəstəxanasına yerləşdirilib. Faktla bağlı araşdırma aparılır.