Polisdən qaçdı, qəza törətdi – BAKIDA - VİDEO

Bakıda yol polisinin “saxla!” əmrinə tabe olmayan sürücü qəza törədib. Avtosfer.az-ın ANS-ə istinadən məlumatına görə, hadisə paytaxtın Səbail rayonu ərazisində baş verib. Yol polisi əməkdaşları yol hərəkəti qaydasını pozan “Mercedes” markalı avtomobilin sürücüsünə saxlamaq əmri verib. Lakin sürücü əmrə tabe olmayıb və polis əməkdaşlarının gözündən yayınmağa çalışıb. Yol polisi əməkdaşları sürücüsünün özünü şübhəli apardığı avtomobili məcburi qaydada dayandırmağa çalışıblar. “Mercedes” Niyazi küçəsi ilə “Azneft" meydanına doğru hərəkət edib. Lakin dairədə yol- patrul xidmətinin avtomobilinin olduğunu görən sürücü yüksək sürətlə Adil İsgəndərov küçəsinə daxil olub. Sürət yüksək olduğundan, sürücü idarəetməni itirib və maşını yol kənarında dayanan “Lada Priora” markalı avtomobilə çırpıb. Polis əməkdaşlarından qaçan sürücünü yalnız bundan sonra dayandırmaq mümkün olub. Hadisədən sonra sürücü polislər tərəfindən sərxoşluq dərəcəsinin təyin edilməsi üçün ekspertizaya aparılıb. 

Qəza ilə bağlı Bakı Şəhər Dövlət Yol Polis şöbəsində araşdırmalar aparılır. Sürücünün şəxsiyyəti və onun polislərdən hansı səbəbdən qaçmağa cəhd göstərməsi isə hələlik məlum deyil.