Şəkidə dəhşətli qəza: 2 ölü, 3 yaralı

Şəkidə 2 nəfər ölümü, 3 nəfərin ağır yaralanması ilə nəticələnən dəhşətli yol qəzası baş verib. Anspress-in verdiyi məlumata görə, hadisə saat 10:40-da Şəkinin Qaşqaçay kəndi yolunda qeydə alınıb. Belə ki, iki “VAZ-2106” markalı avtomobil toqquşub. Qəza nəticəsində hər iki avtomobilin sürücüsü 22 yaşlı Təbriz Əlirəhman oğlu Qurbanov və 50 yaşlı Ramiz Cəlal oğlu Məmmədov hadisə yerində ölüblər. Avtomobillərdə olan sərnişinlər Abdulla Rafiq oğlu Molaxasov, Elsevər Ramiz oğlu Əhmədov və şəxsiyyəti dəqiqləşdirilməyən qadın ağır yaralanıblar. Yaralılar xəstəxanaya yerləşdiriliblər. İlkin ehtimala görə, qəza havanın dumanlı olması səbəbindən baş verib. Faktla bağlı cinayət işi başlanıb, araşdırma aparılır.