Sükanı buraxıb qəzet oxumağa başladı - VİDEO

Demək olar ki, hər gün qəza xəbərlərinin şahidi oluruq. Lakin bir çox sürücülər baş verənlərdən heç cür nəticə çıxarmaq istəmirlər. Sonda elə özləri bu hadisələrin qurbanına çevrilirlər. Avtosfer.az atvxəbər-ə istinadən xəbər verir ki, Türkiyənin İstanbul şəhərində də bir sürücünün məsuliyyətsizliyi izləyən hər kəsi dəhşətə gətirib. Magistral yolda avtomobil sürərkən qəzet oxuyan sürücü həm özünün, həm də yolda olan digər sürücülərin həyatını təhlükə altına alıb. Sürücü hərəkətdə olan avtomobilin sükanını buraxaraq əlindəki qəzeti oxumağa başlayıb. Bir gözü yolda, bir gözü qəzetdə olan sürücünün rahat davranışları digər sürücü tərəfindən anbaan lentə alınıb. Lentə alındığının fərqinə varan sürücü bir anda sürəti artıraraq gözdən itməyə çalışıb. Qeyd edək ki, izləyicilərin böyük təəccübünə səbəb olan qeyri-adi görüntülər mediada da müzakirə mövzusuna çevrilib. Səs-küyə səbəb olan hadisə qəza ilə nəticələnməsə də sürücüyə qarşı müvafiq qurumların tədbir görüləcəyi istisna edilmir.