“Azərpoçt” poçtdaşıma mərkəzində robotları sınaqdan keçirib - FOTO

“Azərpoçt” MMC Yaponiyanın Daxili İşlər və Kommunikasiya Nazirliyi ilə əməkdaşlıq çərçivəsində ölkəmizdə poçtdaşıma mərkəzində robotları sınaqdan keçirib.

Avtosfer.az qurumun yaydığı məlumata istinadla xəbər verir ki, “Azərpoçt”, Yaponiyanın Daxili İşlər və Kommunikasiya Nazirliyi, eləcə də Yaponiya səfirliyinin təşəbbüsü ilə 2023-cü ildən etibarən təməli qoyulan əməkdaşlıq uğurla davam edir.

Əməkdaşlığın əsas məqsədi Yaponiyada qurulmuş və müvəffəqiyyət qazanmış poçt işinin ən yaxşı nümunələrini “Azərpoçt”un iş prosesinə tətbiq etməkdir.

Əməkdaşlıq çərçivəsində poçtun rəhbər nümayəndələri ilə Yaponiyanın Daxili İşlər və Kommunikasiya Nazirliyinin nümayəndə heyəti arasında görüş keçirilib.

Görüşdə poçtdaşıma işinin avtomatlaşması, həmçinin poçt göndərişlərinin sürətli icrası üçün rəqəmsal həllərin tətbiqi imkanları müzakirə olunub.

Sonra yapon qonaqlar poçtdaşıma mərkəzinə səfər edərək, ölkəyə gətirilən “Toshiba” şirkətinə məxsus robotları sınaqdan keçiriblər. Gətirilən robotlar insan əməyini minimuma endirərək qısa zaman ərzində daha çox bağlamaların çeşidlənməsinə, beləcə xidmət keyfiyyətinin yüksəldilməsinə səbəb olacaq. Eləcə də poçt işinin təşkili və iş prosesinin sürətlənməsi ilə müştəri məmnuniyyəti əhəmiyyətli dərəcədə təmin ediləcək.