Bu sürücü hansı halda piyadalara yol verməlidir? – DOĞRU CAVAB

Avtosfer.az ötən həftənin sualının doğru cavabını və ilk doğru cavabı verən şəxsin kimliyini açıqlayır. Yol hərəkətinə dair biliklərini sınamaq istəyənlər üçün sualımız yolayrıcını keçmə zamanı piyadalarla münasibətə aiddir. Yol hərəkəti üzrə ekspert Ərşad Hüseynov tərəfindən hazırlanan sual belədir: Bu avtomobili idarə edən sürücü hansı halda piyadalara yol verməlidir?

A) Yalnız sağa döndükdə yolu keçməkdə olan piyadalara, çünki bu halda sürücü baş yoldan ikinci dərəcəli yola keçir;

B) İstər sağa, istərsə də sola dönərkən piyadalara yol verməlidir;

C) Heç bir halda piyadalara yol verməməlidir, çünki baş yolla hərəkət edir.

Sualın doğru cavabı belədir: “Yol hərəkəti haqqında” Qanunun 75-ci maddəsinin 1-ci hissəsində deyilir ki, sağa və ya sola dönən sürücü dönəcəyi yolun hərəkət hissəsini keçməkdə olan piyadalara yol verməlidir. Göründüyü kimi, bu tələb sürücünün baş yolda və ya ikinci dərəcəli yolda olması ilə əlaqələndirilmir.  Deməli, sualın doğru cavabı “B” variantı olacaq: Bu avtomobili idarə edən sürücü istər sağa, istərsə də sola dönərkən piyadalara yol verməlidir.

Sualın ilk doğru cavabını Emin Paşayev adlı oxucumuz verib. Onu təbrik edirik.

Öyrənək, öyrədək!

Avtosfer.az