Tikinti şirkəti bu yolu bərbad vəziyyətə saldı - FOTO

Yeni Günəşli qəsəbəsi, Samir Cəfərov küçəsi, massiv “V” ərazisində yerləşən "Parla Residence" yaşayış kompleksinin qarşısındakı yolun vəziyyəti son zamanlar ciddi şəkildə pisləşib. Yol örtüyündə yaranmış iri çuxurlar və müxtəlif zədələnmələr ərazidə yaşayan sakinlər üçün ciddi narahatlıq doğurur. Məsələ sosial şəbəkələrdə və yerli ictimaiyyət arasında geniş müzakirələrə səbəb olub. Bildirilib ki, yolun bu vəziyyətə düşməsi "Parla Residence" şirkətinin apardığı tikinti işlərinin nəticəsidir.

Avtosfer.az xəbər verir ki, problemlə bağlı “Teleqraf” Avtomobil Yolları Dövlət Agentliyinə (AAYDA) rəsmi sorğu ünvanlayıb.

Qurumun mətbuat xidmətinin rəhbəri Anar Nəcəfli məsələ ilə bağlı bildirib ki, sözügedən küçədə əsaslı təmir işlərinin aparılması zəruridir:

“Ötən gün bu əraziyə agentliyin və yerli icra hakimiyyəti nümayəndələrinin iştirakı ilə baxış keçirilib. Hazırda ərazidə müvəqqəti olaraq cari təmir işləri aparılacaq. Əsaslı təmirin həyata keçirilməsi üçün isə həmin küçənin növbəti investisiya proqramına daxil edilməsi ilə bağlı müvafiq müraciət olunacaq. Proqrama salındıqdan sonra əsaslı təmir işləri həyata keçiriləcək”.

Hazırkı mərhələdə yalnız müvəqqəti tədbirlərin görülməsi nəzərdə tutulur. Lakin yolun tam şəkildə bərpası yalnız növbəti investisiya proqramlarının təsdiqlənməsi və icrasından sonra mümkün olacaq.