"BMW" Las Veqasda "i Vision Dee" konseptini nümayiş etdirib

BMW şirkəti Las Veqasda keçirilən CES sərgisinə perspektivli rəqəmsal texnologiyaları nümayiş etdirən i Vision Dee konseptini gətirib. Onların arasında ön şüşənin bütün enini tutan qarışıq reallıqlı proyeksiya displeyi, rəqəmsal-fiziki dizayn elementləri və kuzovun 240 hissəsinin hər biri üçün fərdi rəng seçməyə imkan verən ePaper örtüyü də var.

BMW i Vision Dee (Digital Emotional Experience) konsepsiyası rəqəmsal texnologiyaların səsli idarəetmə və yardım sistemlərindən daha çox irəli gedəcəyi yaxın gələcəyi təsvir edir. Məsələn, prototip ön şüşənin bütün enini əhatə edən və 2025-ci ildə Neue Klasse modellərində görünəcək proyeksiya displeyinin qabaqcıl versiyasını nümayiş etdirir.

Konsept həmçinin BMW Mixed Reality Slider sensor açarı ilə təchiz olunub. O, rəqəmsal məzmuna girişin beş səviyyədən birini seçməyə imkan verir. İstifadəçi proyeksiya displeyində “analoqdan” tutmuş real dünyanın virtualı ilə tam əvəzlənməsinə qədər hansı məlumatın göstəriləcəyinə özü qərar verir.

Bu effekt tündələşən şüşələr vasitəsi ilə gücləndirilir. Bundan əlavə, avtomobilə yaxınlaşarkən sürücünün avatarını nümayiş etdirilir.

Futuristik sedan i Vision Circular hetçbekinə bənzəyir. O, müasir BMW avtomobillərinin radiator barmaqlığından və faralardan tutmuş Hofmeister əyrisinə qədər bütün əsas dizayn elementlərini özündə əks etdirir.

Ancaq indi bunlar rəqəmsal və fiziki məkanların qovşağında mövcud olan figital obyektlərdir. Onların sayəsində avtomobil emosiyaları ifadə edə və insanlarla ünsiyyət qura bilir.

Üstəlik, o rəng dəyişdirməyi də bilir. BMW şirkəti E Ink firması ilə əməkdaşlıqda hazırladığı ePaper texnologiyasını təkmilləşdirib. Tərəfdaşlar 32 çalar arasında keçid etməyə imkan verən örtüyü yaradıblar.

BMW i Vision Dee modelinin kuzovu 240 ayrı-ayrılıqda idarə olunan seqmentə bölünür ki, bu da yaradıcılıq üçün sonsuz imkanlar yaradır. Lakin bu texnologiyanın kommersiya istifadəsinə nə qədər hazır olduğu hələlik məlum deyil.

autograph.az