"Mercedes-Benz CLA" ailəsi də yenilənib

Keçən il Mercedes-Benz avtomobillərinin qlobal satışları 1% azalıb (2 milyon 44 min ədədə qədər), əsas itkilər isə yığcam Entry Luxury ailəsinin (eninə mühərrikli) payına düşüb: tələbat 10% azalaraq 587,7 min ədədə düşüb. Təəccüblü deyil ki, şirkət bu ailəni optimallaşdırmağa və xərcləri azaltmağa başlayıb. Keçən ilin payızında təqdim edilən yenilənmiş A-Class və B-Class modelləri minimal dəyişikliklərə məruz qalıb və onların bir sıra modifikasiyaları ixtisara salınıb. İndi isə Mercedes-Benz CLA modelləri eyni ssenari üzrə planlaşdırılan yeniləmədən keçiblər.

Zahiri cəhətdən yenilənmiş Mercedes-Benz CLA modelini ulduz naxışlı radiator barmaqlığı, dəyişdirilmiş ön bamperi və diffuzoru sayəsində tanımaq olar. Halogen fənərlər ilə satılan A-Class modelindən fərqli olaraq, LED fənərlər CLA ailəsinin standart təchizatına daxildir. Optikanın qrafikası da düzəldilib. Model həmçinin 17 ilə 19 düym arasında ölçüdə olan yeni təkər disklərini, habelə eksklüziv Hyper blue kuzov rəngini alıb.

MBUX multimedia sisteminin yeddi düymlük ekranı öz yerini standart 10,25 düymlük ekrana verib, lakin cihazlar paneli əvvəlki kimi yeddi və ya 10,25 düymlük ola bilər. Multimedia kompleksi də yeni qrafiki mövzuları, barmaq izi skanerini və dəyişdirilmiş səs köməkçisini alaraq yenilənib. Bundan əlavə, sistem indi avtomobillərin funksiyaları haqqında danışa bilər - elektron köməkçilərin çoxluğunun sürücüləri tez-tez yanıltdığını nəzərə alsaq, bu çox faydalı əlavədir. Oturacaq üzlükləri kombinə olunub və burada təkrar emal edilmiş parçadan istifadə edilir.

Benzin versiyaları (CLA 180, CLA 200, CLA 220 4Matic, CLA 250 4Matic və AMG CLA 35) standart olaraq sürətlənmə zamanı 14 at qüvvəsi əlavə edən 48 voltluq startyor-generator ilə təchiz edilirlər. Dizel sedan və universalları (CLA 180 d, CLA 200 d və CLA 220 d) isə, "ağır" yanacaqlı A-Class kimi tam ötürmədən məhrum ediliblər. Mercedes-Benz CLA 250 e plagin hibridi tutumu artırılmış dartma batareyasını alıb, nəticədə sedanın sırf elektrik ötürməsi ilə gedə biləcəyi məsafə 82 kilometrə çatıb. Dəyişən cərəyanlı yükləmə cihazının gücü 7,4 kilovatdan 11 kilovata qədər artıb.

CLA modelinin yalnız iki AMG versiyası var - müvafiq olaraq, 306 və 421 at qüvvəli AMG CLA 35 və AMG CLA 45 S. Hər ikisi versiya AMG bölməsinin radiator barmaqlığının üstündə yerləşən loqotipini və standart AMG Performance sükan çarxı alıb. CLA 45 S top versiyası isə, tərkibinə idman kuzov dəsti, narıncı aksentlər, tutqun rəngli diskləri və qırmızı əyləc supportları daxil olan Street Style Edition paketini əldə edib. Belə CLA modellərinin salonunda mikrofiberdən oturacaq üzlüklərini, alüminiumdan dekorativ elementləri və AMG tikmənaxışlarını görmək olar.

Yenilənmiş Mercedes-Benz CLA modelinin Avropadakı satışlarına 2023-cü ilin yazında başlanmalıdır. Bu gün Almaniyada CLA modelinin baza versiyasının qiyməti 34,700 avrodan başlayır, lakin yenilənmə ilə birlikdə qiymətlər nəzərəçarpacaq dərəcədə artacaqdır. A-Class modelini istinad nöqtəsi kimi götürmək olar: restaylinqdən əvvəl onun qiyməti 29 851 avrodan başlayırdısa, indi yığcam sedan üçün ən azı 36 866 avro tələb olunur.

autograph.az