Şəhid pilot Xalid Gözəlovun 25 yaşı tamam olur - FOTO

Bu gün şəhid baş leytenant Xalid Gözəlovun doğum günüdür.

Avtosfer.az xəbər verir ki, Vətən Müharibəsində xüsusi qəhrəmanlıq göstərən igidlərdən biri də Biləsuvar rayonundan olan Gözəlov Xalid Həsən oğludur.

Mərhum 4 yanvar 1996-ci ildə Biləsuvar rayonunun Aşağı Cürəli kəndində anadan olub. 2002-ci ildə Zaqatala şəhərində Ş. Qurbanov adına tam orta məktəbin 1-ci sinfinə getsə də məktəbi doğulduğu kəndin orta məktəbində bitirib. 2012-2016-ci illərdə Dövlət Sərhəd Xidmətinin Akademiyasının Aviasiya fakültəsi üzrə təhsil alıb.

2016-ci ildən Dövlət Sərhəd Xidmətində baş leytenant hərbi rütbəsində pilot kimi xidmətə başlayıb. Xalid Gözəlov Azərbaycan Respublikasının ərazi bütövlüyü uğrunda 27 sentyabr 2020-ci il tarixdə başlayan Vətən Müharibəsində iştirak edib, xüsusi rəşadət göstərərək qəhrəmancasına şəhid olub.

Şəhid Xalid Gözəlov 28 sentyabr 2020-ci ildə Bakı şəhərində II Fəxri Xiyabanda dəfn edilib. Şəhid baş leytenant Ali Baş Komandan İlham Əliyev tərəfindən “Vətən uğrunda” medalı, 3-cü dərəcəli “Vətənə xidmətə görə” ordeni və "Qubadlının azad olunmasına görə medalı" ilə təltif edilib.

Şəhidimiz nişanlı idi.

Allah rəhmət eləsin!