7 aylıq hamilə qadını və ərini öldürən sürücü tutuldu - VİDEO

Paytaxtın Nizami rayonunda dəhşətli yol nəqliyyat hadisəsi qeydə alınıb. ANS-in məlumatına görə, “VAZ 21 07” markalı avtomobil yüksək sürətlə gələrək yolu keçmək istəyən Vüqar Mustafayev və onun həyat yoldaşı Tünzalə Mustafayavanı vurub. Daha sonra sürücü hadisə yerindən uzaqlaşıb. Əraziyə dərhal Nizami Rayon Polis İdarəsinin əməkdaşları cəlb olunub. Hadisə yerən gələn polislər ilk olaraq burada 4 yaşlı uşaq aşkarlayıb. Məlum olub ki, sözügedən uşaq dünyasını dəyişənlərin övladıdır. Yalnız bundan sonra ərazidə polis əməkdaşları axtarışa başlayıb. Müşahidə kameralarının qeydə aldığı görüntülərdən məlum olub ki, “VAZ 21 07”nin sürücüsü hadisəni törətdikdən sonra avtomobilinin işıqlarını söndürərək ərazidən uzaqlaşıb. Elə həmin gün sürücünün şəxsiyyəti məlum olub. O, yaşadığı ünvandan polis bölməsinə, avtomaşını isə cərimə meydançasına aparılıb. Sürücünün kimliyinə gəlincə isə o, 1991-ci il təvəllüdlü Elmir Mehrəliyevdir. Onun barəsində artıq cinayət işi başlanılıb. İlkin dindirmə zamanı sürücünün anlaqsız vəziyyətdə olduğu üzə çıxıb. 

Qeyd edək ki, dünyasını dəyişən Tünzalə Mustafayeva həm də hamilə olub. Qəzanın dəqiq səbəbləri isə araşdırmalardan sonra məlum olacaq.