Ağsu dolaylarında hərəkət çətinləşdi

Ölkənin şimal bölgəsində 2 gündür davam edən qarlı və şaxtalı hava magistral yollara öz təsirini göstərib. Şamaxı-Ağsu dolaylarına qarın düşməsi sürücülərə çətin anlar yaşadıb. Avtosfer.az regiontv-yə istinadən xəbər verir ki, axşam saatlarında Bakı-Şamaxı, Şamaxı-Ağsu yolu qar örtüyünə bürünüb. Ərazidə sürücülər çətinliklə üzləşiblər. Bəzi sürücülər səfərə ehtiyatsız çıxdıqları üçün yolda qalıblar. Dünən bütün gün ərzində yolda təmizlik işi aparılsa da, qarın davamlı yağması hərəkəti çətinləşdirib. Dolaylardakı duman bir müddət görüntü  məsafəsinin minimuma enməsinə səbəb olub. Sürücülər mümkün qədər ehtiyatlı davranmaq və ara məsafəsini düzgün seçməklə baş verə biləcək hər hansı təhlükə ilə üzləşməməyə çalışıblar. 

Hava şəraiti səbəbindən Şamaxı-Ağsu istqamətində hərəkət edən bir çox sürücü geri qayıtmağa məcbur olub. Hazırda yolda nəqliyyatın hərəkəti davam etsə də, çətinlik hələ də tam olaraq aradan qalxmayıb. Yola nabələd olan sürücülərin bu istiqamətdə hərəkət etməmələri, alternativ yollardan istifadə etmələri məsləhətdir.