Nazirlər Kabineti avtobuslarla bağlı qərara DƏYİŞİKLİK ETDİ

Avtobusların müvafiq avtonəqliyyat vasitələri üçün qüvvədə olan ekoloji standartlara uyğun olmaqla, sıxılmış təbii qaz və ya elektrik mühərriki ilə təchiz edilməsi ilə bağlı tələbin qüvvəyə minməsi müddəti daha 3 il təxirə salınıb.

Avtosfer.az-ın xəbərinə görə, bu, Nazirlər Kabinetinin “Bakı şəhərində sərnişindaşımada istifadə olunan avtobuslara və taksi minik avtomobillərinə, onların sürücülərinə, sərnişindaşıma fəaliyyətini həyata keçirən daşıyıcılara, nəqliyyat mübadilə mərkəzlərinə, avtobuslar üçün dayanacaq məntəqələrinə və taksi minik avtomobilləri üçün duracaq yerlərinə dair Tələblər”də etdiyi dəyişiklikdə əksini tapıb. Qərara əsasən, avtobusların müvafiq avtonəqliyyat vasitələri üçün qüvvədə olan ekoloji standartlara uyğun olmaqla, sıxılmış təbii qaz və ya elektrik mühərriki ilə təchiz edilməsi ilə bağlı tələb 2025-ci il yanvarın 1-dən qüvvəyə minəcək.
Bundan əvvəl bu tələbin 2022-ci il yanvarın 1-də qüvvəyə minməsi nəzərdə tutulmuşdu.