Avtomobil qaçıran şəxs tutuldu

Avtomobil qaçırmış Kəlbəcər rayon sakini Oqtay Əsədov, sərnişinləri - Şuşa rayon sakini İlqar Xəlilov və Ağdam rayon sakini Şamil Allahverdiyev saxlanılıb. ANS PRESS-in Daxili İşlər Nazirliyinə istinadla verdiyi məlumata görə, dekabrın 17-də Ağdam rayon sakini Eldəniz Hüseynov Yasamal RPİ 29-cu PB-yə müraciət edərək həmin gün “Daewoo” markalı avtomobilinin qaçırılmasını bildirib. Həyata keçirilmiş əməliyyat-axtarış tədbirləri nəticəsində qeyd edilən avtomobil Qobustan rayonu ərazisində BDYPİ-nin əməkdaşları tərəfindən saxlanılıb. Avtomobili idarə edən Kəlbəcər rayon sakini Oqtay Əsədov, sərnişinləri - Şuşa rayon sakini İlqar Xəlilov və Ağdam rayon sakini Şamil Allahverdiyev aidiyyəti üzrə təhvil veriliblər. Araşdırmalar zamanı E.Hüseynovun avtomobili O.Əsədova satması, pulun müəyyən hissəsini ala bilməməsi ilə əlaqədar polisə bu səpgidə məlumat verməsi müəyyən edilib.