“Azərbaycan Dəmir Yolları” gücləndirilmiş iş rejiminə keçəcək

Bayram günlərində sərnişin axınının artması adi hala çevrilib. Rahat və ucuz nəqliyyat vasitəsi kimi vətəndaşlarımız dəmir yolunun xidmətlərindən istifadəyə üstünlük verirlər. 

Avtosfer.az xəbər verir ki, bu barədə oxu.az-a qurumdan verilən məlumata görə, “Azərbaycan Dəmir Yolları” QSC-nin Sərnişin daşımaları Departamentinin kollektivi müqəddəs Ramazan bayramı ərəfəsində gücləndirilmiş iş rejimi tətbiq edəcək.   

QSC qeyd edib ki, departamentin kollektivi sərnişin qatarlarında xidmət mədəniyyətinin yüksəldilməsi istiqamətində ciddi işlər görür.

“Bayram günlərində sərnişin sıxlığının artması ilə əlaqədar  ölkə daxilində hərəkət edən sərnişin qatarlarına hər gün 10-15, bəzən də 20 ədəd əlavə vaqonun qoşulması təmin ediləcək” - deyə, qurumdan bildiriblər.

ADY həmçinin sərnişinlərin nəzərinə çatdırır ki, sərnişin qatarlarına bilet satışı 10 gün qabaqcadan, əlavə vaqonlara isə bilet satışı həmin vaqon qatara qoşulan gün həyata keçirilir.