Azərbaycana gələn turistlərlə bağlı RƏSMİ AÇIQLAMA - 99 faizi...

2024-cü ilin əvvəlində Azərbaycana turizm məqsədilə səfər edən əcnəbilərin 99 faizi hava nəqliyyat növündən istifadə ediblər.

Avtosfer.az rəsmi məlumatlara istinadən xəbər verir ki, yanvar-aprel ayları ərzində ölkəmizə 472 003 turist gəlib.

Turistlərin 99 faizi, yəni 466 012 nəfəri təyyarələrlə, 5 991 nəfəri su nəqliyyatından istifadə edərək Azərbaycana daxil olublar. Su nəqliyyatı vasitəsilə Azərbaycana gələn turistlərin çoxu Türkmənistan vətəndaşıdır. Onların sayı 3 583 nəfər olub.

Bundan başqa Qazaxıstan (708 nəfər), Rusiya (511 nəfər), Türkiyə (271 nəfər), Özbəkistan (194 nəfər) vətəndaşları arasında da gəmi ilə Azərbaycana gələnlər var.

Qeyd edək ki, Azərbaycan quru sərhədləri bağladığına görə, ölkəmizə yalnız hava və su nəqliyyatı vasitəsilə səfər etmək mümkündür.