Azərbaycanda yeni yol çəkilir

Hüsülü-Kürdlər-Şərəfxanlı-Mirzəhaqverdili avtomobil yolunun tikintisi davam edir. Anspress-in məlumatına görə, Ağcabədi rayonunda 23 min nəfər əhalinin yaşadığı 17 yaşayış məntəqəsini birləşdirən Hüsülü-Kürdlər-Şərəfxanlı-Mirzəhaqverdili avtomobil yolunun tikintisi davam edir. Ümumi uzunluğu 41 kilometr olan yolun Şərəfxanlı-Mirzəhaqverdili kəndlərini birləşdirən 19,4 kilometrlik birinci hissəsinin tikintisi başa çatdırılıb. Yolun bu hissəsində 42 suötürücü qoyulub, asfalt örtüyü salınıb. Yolun eni 6 metr, asfalt örtüyünün qalınlığı 10 santimetrdir. Hazırda yolun Hüsülü-Kürdlər kəndlərini birləşdirən 21,6 kilometrlik hissəsinin tikintisi davam etdirilir. Bu hissədə yol yatağı işlənib hazırlanıb, 8 kilometr məsafədə asfalt örtüyü salınıb. Yolda tikinti işlərinin bu il başa çatdırılması nəzərdə tutulur.