“AzParking” əməkdaşının mülki geyimdə cərimə yazması ilə bağlı ŞİRKƏTDƏN AÇIQLAMA

Sosial şəbəkələrdə “AzParking” əməkdaşlarının mülki geyimdə sürücülərə cərimə yazması ilə bağlı görüntülər yayılıb. Görüntülərdə “AzParking” işçisinin mülki geyimdə sürücülərə cərimə yazdığı iddia olunub.

Yayılımış görüntülərlə əlaqədar, “AzParking” MMC-dən Avtosfer.az-a verilən məlumatda bildirilib ki, yayılan məlumat tamamilə əsassızdır və reallığı əks etdirmir. Şirkətdən verilən açıqlamada qeyd olunub ki, “AzParking”-in parklanma xidməti üzrə bütün əməkdaşları yalnız xüsusi təsdiq olunmuş iş geyimində fəaliyyət göstərir:

“Mülki geyimdə hər hansı şəxsin parklanma üzrə monitorinq etmək səlahiyyəti yoxdur. Sosial şəbəkələrdə yayılan videoda əks olunan şəxsin “AzParking” ilə heç bir əlaqəsi yoxdur. Bununla əlaqədar olaraq, media nümayəndələrini və sosial şəbəkə istifadəçilərini rəsmi mənbələrə əsaslanmayan məlumatları yaymamağa çağırırıq. Bu kimi halların ictimaiyyət arasında çaşqınlıq yaratdığını və qurumun nüfuzuna xələl gətirdiyini nəzərinizə çatdıraraq bildiririk ki, yanlış məlumatların yayılması ilə bağlı hüquqi tədbirlər tərəfimizdən görüləcəkdir.

Vətəndaşlardan xahiş edirik ki, hər hansı şübhəli halla qarşılaşdıqda rəsmi kanallar vasitəsilə “AzParking” ilə əlaqə saxlasınlar”.

Səfər