“Azyaşlıların texnologiyadan istifadəsinə xüsusi proqramla nəzarət mütləqdir” – PSİXOLOQDAN AÇIQLAMA - FOTO

Uşaqlar arasında yayılan onlayn oyun vərdişləri ailələr üçün yeni bir təhlükəyə çevrilməkdədir. Bu oyunların cazibəsi bəzi hallarda uşaq və yeniyetmələrdə ciddi asılılıq yaradır. Belə asılılıq həm psixoloji, həm də sosial baxımdan narahatedici nəticələr doğura bilər. Zamanla bu vərdiş aqressiya, təşviş pozuntusu, sosial təcrid, hətta maddi problemlərlə nəticələnə bilər.

Ən təhlükəli məqamlardan biri də budur ki, uşaqlar bu oyunlar vasitəsilə tanımadıqları şəxslərlə ünsiyyət qurur, bəzən aldanaraq şəxsi məlumatlarını paylaşır və nəticədə şantaj halları ilə üzləşə bilirlər. Valideynlər bu proseslərdən xəbərsiz olduqda isə risklər daha da artır. Ona görə də valideynlər övladlarının onlayn fəaliyyətinə nəzarət etməli, mümkün risklər barədə onlarla açıq şəkildə danışmalıdırlar.

Bəs onlayn oyun asılılığı böyüyən nəsli hansı real təhlükələrlə üz-üzə qoyur?

Mövzu ilə bağlı psixoloq Aygül Məlikova Avtosfer.az-a açıqlamasında bildirib ki, onlayn oyunlar azyaşlıların gündəlik həyatının ayrılmaz hissəsinə çevrilib:

“Lakin bu oyunların cazibəsi bəzi hallarda asılılıq səviyyəsinə qədər yüksəlir. Asılılıq yarandıqda, uşaqlar bu oyunlara pul yatırmağa başlayır və zamanla maliyyə çətinlikləri meydana çıxa bilər. Bu vəziyyətdən yayınmaq üçün isə uşaqlar yalan danışmağa, valideynlərini aldatmağa belə məcbur olurlar.

Onlayn oyunlar yalnız əyləncə məqsədilə deyil, bəzən qarşı tərəflə ünsiyyət qurmaq üçün də istifadə olunur. Lakin bu ünsiyyətlər bəzən təhlükəli istiqamətlərə yönələ bilir. Zamanla aqressiya, təşviş pozuntusu kimi psixoloji problemlər də ortaya çıxa bilər. Xüsusilə yeniyetməlik dövründə olan uşaqlar bu oyunlarda tanış olduqları insanlar tərəfindən aldanaraq şəxsi məlumatlarını və ya şəkillərini paylaşa bilirlər. Təəssüf ki, bu məlumatlar sonradan şantaj məqsədilə istifadə oluna bilər”.

Psixoloq əlavə edib ki, bu səbəbdən valideynlər övladlarını diqqətlə izləməli, onların hansı oyunları oynadığını və həmin oyunlarda kimlərlə əlaqə qurduğunu bilməlidirlər:
“Mümkünsə, xüsusi nəzarət proqramları vasitəsilə bu prosesi nəzarətdə saxlamaq tövsiyə olunur. Uşaqları bu oyunların mümkün təhlükələri barədə məlumatlandırmaq və açıq ünsiyyət qurmaq vacibdir”.

Eltac Zülfüqaroğlu