2020-ci ildə Bakı Şəhər İcra Hakimiyyəti yanında Bakı Nəqliyyat Agentliyinə (BNA) 164,054 milyon manat dövlət investisiyası qoyulub. Avtosfer.az Agentliyinə maliyyə hesabatına istinadən xəbər verir ki, bu, 2019-cu illə müqayisədə 2,5 dəfə azdır. Beləliklə, ötən il yanvarın 1-nə BNA-ya dövlət investisiyaları 705,343 milyon manat təşkil edib ki, bu da 1 il əvvələ nisbətən 30,3% çoxdur.

Xatırladaq ki, BNA ölkə prezidentinin “Paytaxtda nəqliyyat sahəsində islahatların keçirilməsinə dair əlavə tədbirlər haqqında” 21 dekabr 2015-ci il tarixli fərmanı ilə Nazirlər Kabineti yanında yaradılıb, dövlət başçısının “Dövlət idarəçiliyinin təkmilləşdirilməsi ilə bağlı bəzi tədbirlər haqqında” 24 noyabr 2016-cı il tarixli fərmanı ilə publik hüquqi şəxsə çevrilib, ölkə rəhbərinin "Bakı şəhərinin inzibati ərazisində nəqliyyat sahəsində idarəetmənin təkmilləşdirilməsi haqqında" 7 fevral 2022-ci il tarixli fərmanı ilə Bakı meriyasının tabeliyinə verilib. Onun nizamnamə kapitalı 49,068 milyon manatdır. Agentliyin fəaliyyətinin əsas məqsədi Bakıda nəqliyyat vasitələrinin və piyadaların təhlükəsiz, fasiləsiz və rahat hərəkətini təmin etməkdir.