Bakı-Qazax magistralında qəza: yaralılar var

Goranboy rayonu ərazisində ağır yol qəzası baş verib. APA-nin verdiyi məlumata görə, hadisə bu gün saat 15 radələrində Bakı - Qazax avtomagistralının 347-ci kilometrliyində, yolun Goranboy rayonu ərazisindən keçən hissəsində qeydə alınıb. Bakı şəhəri sakini, 1987-ci il təvəllüdlü Aqil Abbasovun  idarə etdiyi “Ford Tranzit” markalı kiçik həcmli yük maşını onun qarşısına  kəsişmə yoldan qəflətən  çıxan Kamaz” markalı betonqarışdıran ilə toqquşub. Nəticədə “Ford Tranzit”in sürücüsü və sərnişini - Bakı sakini, 1973-cü il təvəllüdlü İlqar Həsənov ağır yaralanaraq, Gəncə şəhəri Təcili Tibbi Yardım Xəstəxanasına yerləşdiriliblər. Onların birinin vəziyyətinin ağır, digərinkinin isə orta-ağır olduğu bildirilir.

Qəzanın səbəbkarı olduğu ehtimal edilən “Kamaz”-ın sürücüsü heç bir xəsarət almayıb və o, hadisə yerindən uzaqlaşıb.