Bakıda ağır qəzada ölən qızın kimliyi bilindi - FOTO

Bu gecə Bakıda ölümlə nəticələnmiş qəzada dünyasını dəyişən qızın kimliyi məlum olub. Avtosfer.az-ın FHN mətbuat mərkəzinə istinadən verdiyi məlumata görə, qəzada faciəvi şəkildə dünyasını dəyişən 19 yaşlı Abdullayeva Nərmin Rasim qızıdır. Qəza zamanı avtomobilin altına düşərək sıxılmış vəziyyətdə qalan mərhumun cəsədini FHN xilasediciləri çıxarıblar. 

Xatırladaq ki, bu gecə Bakıda ABŞ-ın Azərbaycandakı səfirliyinə məxsus avtomobilin iştirakı ilə ağır yol nəqliyyat hadisəsi baş verib. ABŞ səfirliyinə məxsus “Chevrolet” markalı maşınla “Zontes” markalı motosiklet toqquşub. Qəza “Chevrolet” ABŞ səfirliyinin Azadlıq prospektində yerləşən binasına dönərkən baş verib. Böyük sürətlə hərəkət edən motosiklet səfirliyin maşınına arxadan çırpılıb. Qəza zamanı motosikletdə yedəkdə oturan qız hadisə yerindəcə keçinib. Motosikletin sürücüsü olan gənc isə ağır vəziyyətdə xəstəxanaya aparılıb. Motosikletdə əyləşən qızın qoruyucu kaskası olmayıb.