Bakıda avtomobilləri talayan 3 nəfər tutuldu

Bakıda silsilə oğurluq edən şəxslər saxlanılıb. Bakı şəhər Baş Polis İdarəsindən Lent.az-a verilən məlumata görə, sentyabrın 14-də Kaveroçkin küçəsində Rəşad Nəbiyevə məxsus «Hyundai-Sonata» markalı avtomobildən oğurluq etməkdə şübhəli bilinən Siyəzən rayon sakini Səmiyar Quliyev, Bakı şəhər sakini Fətulla Əzizov və Masallı rayon sakini Məhəmməd Həbibov polis əməkdaşları tərəfindən tutulublar. İstintaq zamanı məlum olub ki, qrup üzvləri sentyabrın 11-i saat 18:30-dan 13-ü saat 16-dək olan müddətdə Azadlıq prospektində İntiqam Hüseynova məxsus «Lexus» və sentyabrın 14-nə keçən gecə Mirqasımov küçəsində Mahir Əsədliyə məxsus «Toyota-Camry» markalı avtomobillərdən pul və müxtəlif əşyalar götürüblər. Bundan əlavə olaraq  sentyabrın 14-də İ.Qasımov küçəsində Kərim Əbdürəhmanzadəyə məxsus «Peugeot» markalı avtomobildən oğurluğa cəhd ediblər. Faktla bağlı araşdırma davam edir.