Bakıda bu avtobus 1 saatdan artıq intervalla gəlir - ŞİKAYƏT

Sakinlər Bakının iki qəsəbəsini birləşdirən avtobus xəttindən şikayətçidir.

Avtosfer.az xəbər verir ki, bu barədə məlumat “Baku.ws”in "qaynar xətti"nə daxil olub.

Bildirilib ki, söhbət Hövsan ilə Türkan qəsəbələri arasında işləyən 215 saylı marşrut avtobuslarından gedir. Günün istənilən saatı bu avtobusların intervalı 1 saatdan çox olur:

"Əgər bir sərnişin avtobusu qaçırsa növbətinin gəlməsi üçün azı 1 saat gözləməli olur. Hər gün işə gedib-gələn biri olaraq çox əziyyət çəkirəm. Burda sakinlər qışın soyuğu, yayın istisi demədən avtobusu gözləyərkən çox vaxt itirir. Sürücülər iddia edir ki avtobus sayı azdır deyə vəziyyət belədir. İstərdik ki buna çarə tapsınlar", - deyə şikayətçi qeyd edib. 

Problemlə bağlı Azərbaycan Yerüstü Nəqliyyat Agentliyinə (AYNA) müraciət etdik. Qurumdan bildirilib ki, məsələnin həlli ilə bağlı daşıyıcı şirkətə tapşırıqlar verilib:

"215 nömrəli marşrutun daşıyıcısına istismarında olan köhnə avtobusların müasir nəqliyyat vasitələri ilə əvəzlənməsi, marşrutun nizamlı fəaliyyətinin təmin edilməsi, günün pik saatlarında sərnişin sıxlığı yaranacağı təqdirdə  marşruta əlavə avtobusların cəlb edilməsi və hərəkət cədvəlinə riayət olunması barədə tapşırıq verilib", - AYNA-nın açıqlamasında qeyd olunub.