Bakıda dəhşətli tıxac - VİDEO

Bir ildən sonra paytaxtda ilk Avropa Oyunlarının keçiriləcəyi əraziləri birləşdirəcək əsas yollardan olan Ziya Bünyadov prospektindəki təmir-tikinti işlərilə əlaqədar yolda nəqliyyatın hərəkəti dayanıb. Saatlarla sürücülər yollarda qalıb. Tıxac Ayna Sultanova heykəli istiqamətindən başlayaraq 3-cü mikrarayon bazarınadək uzanıb. Sürücülər yaranmış vəziyyətə səbəb kimi Neftçilər prospektinin bağlanmasını da əsas gətiriblər. Mənzil başına, iş yerinə tələsən sürücülər nəqliyyatın hərəkətinin iflic olduğu bu yollarda polis əməkdaşlarının yoxluğundan da gileyləniblər. Bir yandan günün istisi, bir yandan da yanacağın hədər yerə sərf olunması bəzi sürücüləri lap hövsələdən çıxarıb. Kimi yolun nə zaman açılacağını öyrənmək üçün avtomobilindən yerə enib, kimi də səbr etməyib nəqliyyat vasitəsinin yolun ortasında qoyub çıxıb gedib. İlk dəfədir ki məhz bu istiqamətdə uzunmüddətli tıxac yaşandığını deyən sürücülər alternativ yolların da bağlanmasından narazı idilər. Bu dəhşətli tıxac azmış kimi sərnişin avtobusunun yolun ortasında xarab olub qalaması sürücüləri daha da özündən çıxarmışdı. Çox keçməyib ki, avtobus tıxacda qalan digər sürücülərin köməyi ilə yolun ortasından kənarlaşdırılıb. Avtobus tıxacda işlək vəziyyətdə çox dayandığından mühərriki qızdıraraq hərəkətsiz halda qalmışdı. Ümumilikdə bu təmir işləri ilə əlaqədar olaraq yaranmış tıxac Azadlıq və Ziya Bünyadov prospektlərinin qovşağında da nəqliyyatın hərəkətini iflic edib. Yol tamam bağlandığı üçün Binəqədi istiqamətinə gedən sərnişinlər uzaq yolu piyada qət etmək məcburiyyətində qalıblar. Bütün bunları nəzərə alaraq sürücülərin adını çəkdiyimiz ərazilərlə hərəkət etməsi heç tövsiyyə olunmur.