Bakıda laqeydsizlikdən doğan problem

Avtosfer.az xəbər verir ki, Bakıda diqqətsizlikdən yaranmış süni tıxac insanlar üçün ciddi problem yaradır. Oxucuların milli.az-a verdikləri məlumata görə, Yeni Yasamal ərazisində yerləşən “Bizim market” ticarət obyektinin qarşısında paytaxt sakinləri hər gün əziyyət çəkirlər. Axşam saat 6-dan sonra orada yaranan tıxac hər bir ailə başçısını evinə ən azı 45 dəqiqə gecikdirir. Bəzən elə olur ki, sürücülər öz maşınlarını yol kənarında park edərək evə piyada getmək məcburiyyətində qalırlar. “Marketin qarşısında yol kifayət qədər enlidir, lakin yolun kənarında dayanan taksilər yolu daraltmaqla bərabər, avtobusları ikinci sırada dayanaraq sərnişinləri düşürüb-mindirməyə məcbur edir. Bu isə tıxacın yaranmasına gətirib çıxarır. Yol ayrıcında Dövlət Yol Polisinin kameraları olmasına baxmayaraq, bir dəfə də olsun yol polisi tıxaca müdaxilə etmir”, - deyə oxucular şikayətlənirlər.

Bakı Şəhər Yol Polisi İdarəsindən bildirildi ki, yol polisi təhkim olunduğu dislokasiya üzrə xidmət aparır və qeydə aldığı qanun pozuntusu üçün tədbir görür. Həmin ərazidə xidmət aparan naryad Yasamal ərazisində şikayət yaradan problemlə bağlı məlumatlandırılacaq.