Bakıda qəribə yol əhvalatı

Avtosfer.az xəbər verir ki, day.az-a məktub yazan Vasif adlı oxucu qəribə əhvalatla rastlaşıb. Bu günlərdə o, Dövlət Yol Polisindən qırmızı işıqdan keçməsi ilə bağlı bildiriş alıb. Baxmayaraq ki, o, borcunu 2014-cü ilin oktyabr ayında bağlayıb. Bildirişdə dəqiq yazılıb ki, cərimə ödənilməzsə, avtomobil cərimə meydançasına aparılacaq. 

Belə bir məqamda oxucunu başqa bir problem də narahat edir. O, cəriməni Kapital Banka ödəyərkən ona qəbz veriblər, ancaq itirib. Oxucu belə bir məqamda necə davranacağı ilə maraqlanır. 

"Necə sübut etmək olar ki, cəriməni ödəmişəm?" - deyə oxucu sual edir. Məsələ ilə əlaqədar saytın əməkdaşı Bakı şəhər Baş Dövlət Yol Polisi İdarəsi ilə əlaqə saxlayıb. İdarədən ona bildiriblər ki, əgər vətəndaş cəriməni ödəyibsə və qəbzi itiribsə, banka müraciət edərək sənədin nüsxəsini almalıdır. Əgər sürücünün məlumatları bazaya daxil edilməyibsə, deməli, texniki problem baş verib. Bu məsələni araşdırmaq lazımdır. Yeganə çıxış yolu surətin çıxarılmasıdır.