Bayılda yol bağlayanlar cəzalandırıldı, yol açıldı - VİDEO-FOTO

Bayıl qəsəbəsində yerləşən Səbail rayon Dövlət Yol Polisi Şöbəsinin qarşısındakı yolu bağlayan şəxslər cəzalandırılıb. Avtosfer.az bir neçə gün xəbər vermişdi ki, ərazidəki beşmərtəbəli binaların sakinləri yolun bağlanmasına görə əziyyət çəkir. Belə ki, Bayıl qəsəbəsində "Bəy Mamed" kimi tanınan iş adamının tikdirdiyi binaların arasından əsas yola çıxan hissəyə dəmirlər basdıraraq hərəkəti məhdudlaşdırıblar. Həmin kəsişmədə hətta sola hərəkəti bildirən yol nişanı da quraşdırılıb. Yolda sıxlıq yaranan zaman sürücülər qeyd etdiyimiz köməkçi yoldan istifadə edərək gedəcəkləri məsafəni qısaldırdılar. Lakin maneə quraşdırılandan bəri həmin köməkçi yoldan istifadə etmək mümkünsüz olub.

Bu gün Səbail rayon Polis İdarəsinin əməkdaşları ərazidə araşdırma apardıqdan sonra yolun qanunsuz olaraq bağlandığını müəyyən ediblər. Bununla əlaqədar olaraq yolu bağlayanlar cəzalandırılıb, ərazisə basdırılan borular və digər maneələr isə yığışdırılıb. Artıq həmin yol sakinlərin istifadəsindədir.

Göstərilən operativ reaksiyaya görə ərazidə yaşayan sakinlər Daxili İşlər Nazirliyi rəhbərliyinə və Səbail rayon Polis İdarəsinə təşəkkürünü bildirib.

Emin