Binanın həyətində obyekt tikmək sitədilər; icra hakimiyyəti qarşısını aldı - VİDEO

Sosial şəbəkələrdə Xətai rayonunda məhəlləyə vurulan səki daşlarının kimlərsə tərəfindən sökülməsi ilə əlaqədar video yayılıb.

Avtosfer.az xəbər verir ki, rayonun Nəcəfqulu Rəfiyev küçəsi 29 ünvanında binanın həyətində kimliyi məlum olmayan şəxslər tərəfindən səkidə söküntü işlərinə başlanması ilə əlaqədar görüntülər paylaşılıb. Binada yaşayan sakinlər bildiriblər ki, söküntü işləri həyətdə obyekt tikmək üçün başladılıb. Müəyyən hissədə artıq daşlar bilərəkdən partladılıb. Sakinlər həmin şəxslərin özlərinə bununla əlaqədar xəbərdarlıq etsələr də, nəticə əldə edə bilməyiblər. Buna görə də rayon icra hakimiyyətinə müraciət etməli olublar.

Xətai Rayon İcra Hakimiyyətinin şöbə müdiri Pənah İmanov Avtosfer.az-a açıqlamasında bildirib ki, bina sakinləri tərəfindən dünən bu barədə quruma şikayət daxil olub. Şikayətdə bildirilib ki, binanın 1-ci mərtəbəsində qeyri-yaşayış sahəsinə aid müəssisənin işçiləri tərəfindən söküntü işləri başladılıb:

“Bizə məlumat daxil olan kimi icra başçısının göstərişi ilə qarşısı alınıb. Məhəllədəki söküntü işləri tamamilə dayandırılıb və ərazi ilkin vəziyyətinə bərpa olunub”.

Səfər