Bir gündə «Kamaz»ın iştirakı üçüncü qəza baş verdi; 1 ölü

Bu gün axşam saatlarında Bakı-Quba-Rusiya yolunun 132-ci kilometrliyində ağır yol qəzası baş verib. Anspress-in verdiyi məlumata görə, Şabran rayonunun Qəndob kəndi ərazisində iki maşın toqquşub. Nəticədə sürücülərdən biri hadisə yerində ölüb.Qəza zamanı 1980-ci il təvəllüdlü Rəşid Fərəculla oğlu Miqbilovun idarə etdiyi Bakı istiqamətində hərəkət edən “Kamaz” markalı yük maşını ilə 1982-cı il təvəllüdlü Rafiq Adıgözəl oglu Mövlanverdiyevin idarə etdiyi Quba istiqamətində hərəkət edən VAZ-2106 avtomobili toqquşub.  Qəza nəticəsində Rafiq Adıgözəl oglu Mövlanverdiyev həlak olub. Hadisə yerində olan Baş Dövlət Yol Polisinin İstintaq Təhqiqat İdarəsinin müstəntiqi Elşən Mürsəliyev bildirib ki, qəza zamanı günah VAZ-2106 avtomobilinin sürücüsü Rafiq Mövlanverdiyevdə olub. O, qarşıdan gələn “Kamaz”ın yoluna çıxıb. Hadisə ilə bağlı cinayət işi açılıb.

Avtosfer.az-ın məlumatına görə, bu, mayın 30-da yük maşınlarının iştirakı ilə baş vermiş üçüncü yol qəzasıdır. Bu gün Ağsu rayonunda da «Shagman» markalı avtomobilin iştirakı ilə ağır qəza baş verib, 4 nəfər ölüb, 7 yaralı var. Axşam saatlarında isə «Kamaz» markalı avtomobil Bakı-Sumqayıt yolunda sərnişin avtobusu ilə toqquşub. Yaralılar var.