BQXK Ermənistandakı girovlarla görüşəcək

Yaxın günlərdə Beynəlxaql Qızıl Xaç Komitəsinin üzvləri Ermənistan silahlı qüvvələri tərəfindən Kəlbəcər rayonu ərazisində girov götürülmüş Rusiya Federasiyasının vətəndaşı Dilqəm Əsgərov və Azərbaycan Respublikasının vətəndaşı olan Şahbaz Quliyevlə görüşəcəklər. Bu barədə anspress-ə açıqlamasında BQXK-nın Azərbaycan nümayəndəliyinin İctimaiyyətlə əlaqələr şöbəsinin rəhbəri İlahə Hüseynova məlumat verib. O, qeyd edib ki, əsirlərlə sonuncu görüş 28 iyul tarixində baş tutub: "Səhhətləri barəsində heç bir məlumat verə bilmərik. BQXK əsirlərin geri qaytarılması ilə bağlı mütəmadi olaraq danışıqlar aparır. Ailələri ilə də əlaqə saxlayırıq. Göstərilən girovlar və Həsən Həsənovun meyidinin qaytarılması istiqamətində işlər davam etdirilir".

Qeyd edək ki, Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə Ermənistan Silahlı Qüvvələri tərəfindən girov götürülüb, digər Azərbaycan vətəndaşı Həsən Həsənov isə öldürülüb. Həsən Həsənovun Dağlıq Qarabağda dəfn edildiyi deyilir.