“Bu qərarla heç bir məhsul ucuzlaşmayacaq” - AÇIQLAMA

Nazirlər Kabineti “Dövlət ehtiyatları üçün malların tədarükü, saxlanılması, buraxılması və uçotu” qaydalarını təsdiq edib. Yeni sənəd ilə strateji, fövqəladə və səfərbərlik ehtiyatları üçün malların tədarükü, saxlanılması, buraxılması, uçotu; bu sahədə nəzarətin həyata keçirilməsi, dövlət ehtiyatlarına aid olan malların hərəkəti və mövcudluğu barədə hesabatın formasının və təqdim edilməsinin qaydası və hüquqi əsasları müəyyən edilib. 

Mövzu ilə bağlı iqtisadçı ekspert Akif Nəsirli bildirib ki, bu qaydaları dəyişməkdə məqsəd heç də ölkədə hər hansı bir mal və məhsulun qiymətinin ucuzlaşması deyil:

“Bu qaydaların dəyişdirilməsi həmin problemlərin aradan qaldırılmasına yönəlib. Məsələn, ərzaq buğdasının strateji ehtiyat kimi alınması zamanı kifayət qədər şişirdilmələrə yol verilirdi. Bunu da onunla izah edirdilər ki, daha keyfiyyətli, daha çox standartlara uyğun məhsul aldığımıza görə bu məhsullar baha başa gəlir. Amma hər halda hökumət hesab edir ki, bu istiqamətdə müəyyən işlər görmək lazımdır.  İndiki qaydalara görə, prosesdə müəyyən neqativ halların aradan qaldırılmasına yönəlik müəyyən tədbirlər görülübdür. Düşünmürəm ki, bu qərarın dəyişdirilməsi, yəni yeni qərarın qəbul edilməsi bu sahədə əyintiləri tamamilə aradan qaldıracaqdır. Ümumiyyətlə, dünyada hökumət pul verib nə isə alırsa, orada mütləq əyinti olur, mütləq korrupsiya olur. Bu, dünyanın ən demokratik, ən inkişaf etmiş ölkələrində də belədir. Ən yaxşısı odur ki, dövlət həmişə belə alışlardan maksimum qaçmalıdır. İqtisadiyyat tənzimləməni elə qurmalıdır ki, hökumət satın almalarına ciddi ehtiyac qalmasın”. 
 

(demokrat.az)