Deputat bu cərimələrə haqq qazandırdı

Paytaxtın müxtəlif yerlərində yolu keçərkən polis tərəfindən saxlanılaraq 20 manat cərimələnlərin sayı artıqca narazıların da sayı adekvat artır. Demək olar ki, az qala hər gün bununla bağlı moderator.az-a şifahi müraciətlər olur və insanlar öz etirazlarını bildirirlər ki, İnzibati Xətalar Məcəlləsində xətaya yol verilib. Yəni birinci dəfə xəbərdarlıq edilməli, bununla bağlı polislər tərəfindən xüsusi qeydlər aparılmalı, yalnız bir şəxs ikinci dəfə yolu keçərkən qaydaları pozarsa, yəni piyadalar üçün müəyyən olunmuş yolu deyil, intensiv hərəkət olan yolu keçərsə cərimələnsin. Amma deputat Rafael Cəbrayılov deyir ki, xəbərdarlıq heç bir halda işə yarayan deyil və insanlar cərimələnməsə, onlar mütəmadi olaraq eyni səhvləri təkrarlayırlar: "Təcrübə göstərir ki, digər tənbeh üsulları bu kimi hallarda səmərə vermir. Digər tərəfdən, bazar iqtisadiyyatının özünəməxsus qanunauyğunluqları var və maddiyyat hər şeyi üstələyir. Odur ki, insanları bu kimi xəta pozuntularından çəkindirmək üçün cərimələmək lazımdır ki, o bir daha belə səhv etməsin. Yoxsa, tənbeh etmək və ya xəbərdarlıq etməklə bu məsələdə nizam-intizam yaratmaq mümkün olan deyil».