DYP piyadalara görə narahatdır: 10 günə 11 ölü

Bu ilin fevral ayının 1-dən 11-dək respublikada 97 yol qəzası qeydə alınıb. Nəticədə 27 nəfər ölüb, 131 nəfər yaralanıb. Bunlardan 35 hadisə piyadaların vurulması ilə bağlı olub. Avtosfer.az xəbər verir ki, bunu Daxili İşlər Nazirliyi (DİN) Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev deyib. Onun sözlərinə görə, fevral ayının 1-dən 11-dək 35 piyada vurulması ilə nəticələnən yol-nəqliyyat hadisəsi baş verib. Bu zaman 11 nəfər ölüb, 30 nəfər yaralanıb. K.Əliyev eyni zamanda əlavə edib ki, piyadalarla bağlı baş verən yol qəzalarının çoxluğu onların intizamsız hərəkət iştirakçıları olduğunu göstərir. “Piyadalar həyatlarını təhlükə altında qoymamalı, onlar üçün müəyyən edilmiş keçidlərdən keçməli, işıqforun onların hərəkətinə icazə verən işığının yanmasını gözləməli, özlərini hərəkətdə olan avtomobillərin qabağına atmamalıdırlar. Ölkədə qeydə alınan yol qəzalarının və ölüm hallarının əksəriyyətinin piyadaların vurulması ilə bağlı olması ciddi narahatlıq doğurur”.