Ermənistanın dəmir yolları Azərbaycana verilə bilər? - AÇIQLAMA

“Ermənistandan Rusiyaya qarşı ziddiyyətli siqnallar gəlir. Parlamentin sədri Rusiyanın “Tramp Marşrutu”nda yerinin olmadığını, Baş nazir Nikol Paşinyan isə regional nəqliyyat layihələrinə dəstək üçün Prezident Vladimir Putinlə danışıqlar apardığını deyir”.

Avtosfer.az "Teleqraf"a istinadən xəbər verir ki, bunu rusiyalı politoloq Andrey Areşev deyib.

Ekspert bildirib ki, hazırda Rusiya və Ermənistan arasında danışıqlar getmir, danışıqlara hazırlıq prosesi gedir.

Areşev “Rusiya Dəmir Yolları”nın törəmə şirkəti “Cənubi Qafqaz Dəmir Yolu”nun üçüncü tərəfə verilməsi ilə bağlı İrəvanın açıqlamasını belə şərh edib:

“Pashinyanın “Cənubi Qafqaz Dəmir Yolu”nun üçüncü tərəfə, məsələn, Qətər, Qazaxıstan və Omana verilməsi barədə açıqlamasından görünür ki, Türkiyə və Azərbaycanın da bu prosesdə iştirakını istisna etmir. Çünki bu məsələ Naxçıvan və Türkiyə ilə bağlıdır”.

Ermənistan KİV-in yaydığı məlumata görə, İrəvan bəzi ölkələrə “Rusiya Dəmir Yolları”nın törəmə şirkəti “Cənubi Qafqaz Dəmir Yolu”nu almaq və idarə etmək üçün müraciət edib. Məsələ Ermənistanın Azərbaycan və Türkiyə ilə əlaqəli dəmir yollarının iki hissəsinin bərpası ilə bağlı Rusiyaya müraciəti kontekstində gündəmə gəlib. Rusiya baş nazirinin müavini Aleksey Overçuk Baş nazir Nikol Paşinyanın müvafiq mesajından sonra Moskvanın İrəvanla danışıqlara başlayacağını açıqlamışdı. Ermənistanın ərazi idarəetməsi və infrastruktur naziri Davit Xudatyan bundan sonra artıq danışıqların başladığını bəyan etmişdi.