Gəncədə mübahisə zəminində 2 qardaş bıçaqlanıb - YENİLƏNİB

Gəncə şəhərində iki nəfəri bıçaqlamaqda şübhəli bilinən şəxs saxlanılıb.

Daxili İşlər Nazirliyinin Mətbuat Xidmətinin Gəncə regional qrupundan verilən məlumata görə, martın 25-də axşam saatlarında Gəncə şəhər sakinləri 28 yaşlı Osman Dadaşov və qardaşı, 30 yaşlı Salman Dadaşovun bıçaq yaraları ilə Gəncə şəhər 3 saylı Təcili Tibbi Yardım Xəstəxanasına gətirilməsi barədə Gəncə şəhər Baş Polis İdarəsinin Kəpəz Rayon Polis İdarəsinə (RPİ) məlumat daxil olub.

İlkin araşdırma zamanı məlum olub ki, 1994-cü il təvəllüdlü Gəncə şəhər sakini Nicat Qurbanov ailə münaqişəsi zamanı, bacısının həyat yoldaşı Osman Dadaşovu və sonuncunun qardaşı Salman Dadaşovu bıçaqla qəsdən vuraraq döş qəfəslərinin daxilinə keçən kəsilmiş-deşilmiş yaraları xəsarəti yetirib.

RPİ-nin  əməkdaşlarının “isti izlər”lə keçirdikləri təxirəsalınmaz istintaq-əməliyyat tədbirləri nəticəsində  N. Qurbanov saxlanılaraq istintaqa təqdim edilib.

Faktla bağlı araşdırmalar aparılır.

23:09 (25.03.2021)

Gəncə şəhərində mübahisə zamanı iki nəfər bıçaq xəsarəti alıb.

Avtosfer.az-ın məlumatına görə, şəhərin Üzeyir Hacıbəyli küçəsində qeydə alınan hadisədə 29 yaşlı Osman Aydın oğlu Dadaşov və onun qardaşı 30 yaşlı Salman bıçaq xəsarəti alıblar.

Hər iki şəxs hadisə yerinə cağırılan təcili tibbi yardım maşını ilə xəstəxanaya aparılıblar.

Hadisənin hansı səbəbdən baş verdiyi polis əməkdaşları tərəfindən araşdırılır.