Gəncənin ictimai nəqliyyatında çalışmaq üçün müraciət edənlərin sayı açıqlanıb

İctimai nəqliyyat sahəsində çalışacaq peşəkar və məsuliyyətli sürücü heyətinin formalaşdırılması istiqamətində işlər davam etdirilir. Bu işə töhfə vermək məqsədilə Azərbaycan Yerüstü Nəqliyyat Agentliyinin (AYNA) Təlim-Tədris Mərkəzində avtobus sürücüləri üçün təlimlər keçirilir. Mərkəzin mütəxəssisləri Gəncədə də bu təlimləri təşkil edirlər. AYNA-dan Avtosfer.az-a bildirilib ki, Gəncə şəhərində ictimai nəqliyyat sahəsində fəaliyyət göstərmək üçün müraciət edən 700-ə yaxın şəxsdən artıq 478-nin sürücülük bacarıqları yoxlanılıb. İlkin qiymətləndirmə zamanı müvəffəqiyyət qazanan 343 nəfər növbəti mərhələyə keçib. Onlar tibbi yoxlanışdan sonra mərhələli qaydada təlim prosesinə cəlb edilirlər.