Hövsanda avtomobil avtobusla toqquşub, xəsarət alan var - FOTOLAR

Bakının Suraxanı rayonu, Hövsan qəsəbəsində sürücünün xəsarət alması ilə nəticələnən qəza baş verib. APA-nın xəbərinə görə, qəza Hövsan qəsəbəsinin girişində, kanalizasiya sularının axıdıldığı kanalın yaxınlığında baş verib. 10 BG 728 dövlət nömrə nişanlı “Toyota” markalı avtomobil dönmə əməliyyatı edən zaman 132 nömrəli marşrut avtobusunun yoluna çıxıb. Avtobusla toqquşan minik maşını kanalın qoruyucu dəmir səddinə çırpılıb. Yüngül xəsarət alan “Toyota”nın sürücüsü 3 saylı şəhər klinik xəstəxanasına, avtomobili isə cərimə meydançasına aparılıb. Avtobusda xəsarət alan olmayıb. Faktla bağlı Suraxanı Rayon Polis İdarəsində araşdırma aparılır.