İki avtomobil toqquşub: xəsarət alan var

Gecə saatlarında paytaxtın Binəqədi rayonu, Rəsulzadə qəsəbəsində bir nəfərin xəsarət alması ilə nəticələnən yol qəzası baş verib. APA-nın məlumatına görə, 25 yaşlı Arif Feyziyev idarə etdiyi “Mercedes” markalı avtomobillə Azadlıq prospekti ilə hərəkətdə olarkən yol hərəkət qaydalarını pozaraq, təyin edilməmiş yerdə dönmə əməliyyatını yerinə yetirmək istəyib.  Lakin əks istiqamətdə hərəkət edən “Opel” markalı avtomobil idarəetməni itirərək “Mercedes”ə çırpılıb. Nəticədə “Mercedes”in sürücüsü xəsarət alıb. Hadisə yerinə təcili yardım briqadası və Yol patrul xidmətinin əməkdaşları gəlib. Xəsarət alan sürücü 1 saylı Şəhər Kliniki Xəstəxanasına aparılıb. Baş verən qəzadan sonra Azadlıq prospektində avtomobillərin hərəkətində məhdudiyyət yaranıb. Yararsız hala düşmüş avtomobillər hadisə yerindən uzaqlaşdırıldıqdan sonra prospektdə avtomobillərin hərəkəti bərpa olunub. Hadisə yerində olan polisin araşdırmaları nəticəsində məlum olub ki, qəza sürücü Arif Feyziyevin yol hərəkəti qaydalarını pozması nəticəsində baş verib.