İnəyi maşın vurdu, kənd ayağa qalxdı

Türkiyədə sürücünün yoldan keçən mal-qaranı vurması ona baha başa gəlib. Anspress-in məlumatına görə, ötən gün axşam saatlarında Ərzurumda şəhər mərkəzindən yola çıxan sürücünün yoluna bir anda inək çıxıb və sürücü avtomobili qaçıra bilməyərək, inəyi vurub. Hadisə baş verdikdən sonra mal sahibləri sürücü ilə dava etməyə başlayıb. İki qardaşın sürücünü təkləməkləri azmış kimi, onlardan biri yaxınlıqdakı kənd camaatına xəbər verib. Əsl hadisə elə bundan sonra baş verib. Belə ki, kənddən gələnlər əllərində dəmir dəyənək və bıçaqlar olub. Baş verənlərdən xəbər tutan polis də çox keçmədən özünü hadisə yerinə çatdırıb. Mal-qaranın sahibi qardaşlardan biri sürücünü bıçaqlayıb, polisin xəbərdarlığına əhəmiyyət vermədikdə isə polis onların ikisini də vuraraq yaralayıb. Yaralılar xəstəxanaya çatdırılıb. Hadisə ilə bağlı polis istintaq işi başladıb.