"Kənd Təsərrüfatı Nazirliyi niyə Bakıda olmalıdır?" - Deputatdan tıxaclarla bağlı TƏKLİF

"Formula-1" üzrə Azərbaycan Qran-prisinin keçirilməsi ilə əlaqədar Bakı şəhərində mövcud olan ali təhsil müəssisələrinin fəaliyyətinin tənzimlənməsi ilə bağlı müvafiq əmr imzalanıb. Əmrə əsasən, 23-25 sentyabr tarixlərində Bakı şəhərində fəaliyyət göstərən ali təhsil müəssisələrində tədris prosesi distant formada təşkil olunacaq. Həmçinin, Bakıda metroda aparılan təmir işləri ilə əlaqədar nəqliyyat sıxlığının artması da paytaxt sakinlərinin gündəlik gediş-gəlişinə mənfi təsir göstərir. Əbəs deyil ki, bu gündən etibarən distant təhsilə müvəqqəti keçid belə, yollarda sıxlığın azalması ilə nəticələnib.

Bəs, tıxacın əsas səbəblərindən biri həqiqətən də universitetlərdirmi? Belə olan halda, ali təhsil müəssisələrinin regionlara köçülürməsi real görünürmü?

Avtosfer.az xəbər verir ki, mövzu ilə bağlı Oxu.Az-a danışan Milli Məclisin deputatı Elşad Musayev bildirib ki, tıxacın yaranmasının çoxlu səbəbləri var:

"Səbəblərdən biri universitetlərlə yanaşı, nazirliklərdir. Bunların əksəriyyəti Bakı şəhərində yerləşir. Ona görə də düşünürəm ki, universitetlərin və nazirliklərin böyük bir hissəsi Bakıdan kənarda yerləşməlidir. Məsələn, Kənd Təsərrüfatı Nazirliyi niyə paytaxta olmalıdır? Həmçinin, istənilən nazirlik şəhərdən kənara köçürülə bilər. Lakin universitetlər köçürülsə, yəni, yeni nəsil paytaxtdan kənarda təhsil alsa, onlara da şərait yaradılmalıdır".