Məktəb açıldı, tıxac yarandı

Yeni dərs ilinin ilk günü Bakıda böyük avtomobil tıxacları ilə başlayıb. Avtosfer.az “Qafqazinfo”ya istinadən xəbər verir ki, səhər saatlarından müxtəlif istiqamətlərdən paytaxta girişdə, Sumqayıt, Zabrat və Aeroport yolunda uzun tıxaclar yaranıb. Həmçinin şəhərin mərkəzində də əksər istiqamətlərdə, xüsusilə də ali və orta məktəblərin yerləşdiyi ərazilərdə sıxlıq yaranıb. 

Daxili İşlər Nazirliyinin (DİN) Bakı şəhər Baş Polis İdarəsinin Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovnik-leytenantı Vaqif Əsədov isə Trend-ə bildirib ki, Bilik Günü ilə bağlı Bakıda bütün istiqamətlərdə avtomobillərin böyük sıxlığı müşahidə olunur: “Paytaxtın bütün istiqamətlərdə yollarda zolaqlar üzrə avtomobillərin sıx cərgələnməsi müşahidə edilir. Xüsusilə təhsil müəssisələrinin yerləşdiyi küçə və prospektlərdə, o cümlədən Babək prospekti ilə şəhər istiqamətinə, Koroğlu Rəhimov küçəsindən metronun “Gənclik” stansiyası istiqamətinə, Azadlıq və İnşaatçılar prospektlərindən şəhərin mərkəzinə doğru, Bayıl qəsəbəsindən Azneft dairəsi istiqamətinə, Tbilisi prospektində 20 yanvar dairəsindən şəhərin mərkəzinə doğru, metronun “Koroğlu” stansiyasından şəhərə doğru Heydər Əliyev prospekti boyu, Parlament prospektində və s. yollarda nəqliyyat vasitələrinin sıxlığı müşahidə edilir”.

Bölmə rəisi həmçinin qeyd edib ki, bütün istiqamətlər üzrə yol polisi əməkdaşları avtomobillərin hərəkətini tənzimləyir. Onun sözlərinə görə, bu ana qədər avtomobillərə zərər dəyməsi ilə nəticələnən bir neçə yol qəzası baş versə də, xoşbəxtlikdən insan xəsarətinin qeydə alındığı hər hansı hal baş verməyib.