Metroda nə vaxta kimi pulsuz hərəkət etmək olar?

İyulun 1-dən etibarən Bakı 2015 Avropa Oyunları Əməliyyat Komitəsində (BEGOC) rəsmi akkreditasiyadan keçmiş şəxslər metrodan pulsuz istifadə edə bilməyəcəklər.

Avtosfer.az xəbər verir ki, bu barədə trend-in sorğusuna cavab olaraq "Bakı Metropoliteni" QSC-nin Mətbuat xidməti və ictimaiyyətlə əlaqələr şöbəsinin rəisi Nəsimi Paşayev deyib.

Şöbə rəisinin sözlərinə görə, BEGOC-da rəsmi akkreditasiyadan keçmiş şəxslər yalnız iyunun 30-u günün sonunadək metroda ödənişsiz hərəkət edə bilərlər: "İyulun 1-dən etibarən isə akkreditasiyalı şəxslərin metrodan pulsuz hərəkət hüququ qüvvədən düşəcək. Ona görə də həmin şəxslər də hamı kimi metroda ödənişli qaydada hərəkət etməlidirlər".

Qeyd edək ki, Bakı 2015 I Avropa Oyunları ilə əlaqədar BEGOC-da rəsmi akkreditasiyadan keçmiş, eləcə də əlində bileti olub idman arenalarına gedən şəxslərə Bakı Metrpoliteninin xidmətindən pulsuz istifadə hüququ verilmişdi.