Mina avtobusa dəydi: 4 ölü, 9 yaralı
Ukraynanın Luqansk vilayətinin Çervonopartizansk şəhərində separatçıların atdığı mina şaxtaçıları daşıyan avtobusa tuş gəlib, nəticədə 4 nəfər ölüb, 9 nəfər yaralanıb. APA-nın “UNN”-ə istinadən verdiyi xəbərə görə, bu barədə hüquq-mühafizə orqanlarının açıqlamasında bildirilir. Məlumata görə, insident işdən sonra xidməti avtobusun yola düşməsindən bir neçə dəqiqə sonra baş verib. Ukrayna ordusunun bəyanatına əsasən, əməliyyata cəlb olunan ordu birləşmələri yaşayış məntəqələrində və onlara yaxın ərazilərdə minaatanlardan istifadə etmir.
Ukraynanın Luqansk vilayətindəki “Doljanski” sərhəd nəzarət-buraxılış məntəqəsinin yaxınlığında isə 4 ukraynalı hərbçi həlak olub. Bu barədə yerli İCTV telekanalı məlumat yayıb. Məlumata görə, silahlı separatçılara qarşı antiterror əməliyyatda iştirak edən “BMP-2” piyadaların döyüş maşını minaya düşüb. Bundan başqa, silahlılar Ukrayna ordusunun nəzarətində olan Donetsk aeroportunu minaatanlardan, qumbaraatanlardan və yük maşınlarına quraşdırılmış ZU-23-2 tipli zenit qurğularından atəşə tutublar. Hərbçilər tərəfdən itki olmadığı bildirilir. Hərbçilər cavab atəşi açıblar.