Murovdağda itkin düşmüş hesab edilən döyüşçü qəhrəmancasına şəhid olubmuş - FOTO

Qarabağ qazisi, jurnalist Rey Kərimoğlu özünün feysbuk hesabında Murovdağ əməliyyatında itkin düşmüş şəhid Hüseynov Famil Ağaverdi oğlunun şəklini paylaşaraq axtarırdı. 

Bu barədə Rey Kərimoğlu Qaziler.az-a bildirib ki, artıq axtardığı şəhid haqqında məlumat əldə edə bilib.

R. Kərimoğlu qeyd edib ki, şəhid Famil Hüseynov haqqında ona səs yazısı göndərib, zəng ediblər. Məlum olub ki, o, 1994-cü ilin yanvar ayında Murovdağ istiqamətində gedən döyüşlərə qatılıb və qəhrəmancasına şəhid olub. Bu barədə artıq şəhidin ailəsinə  məlumat verilib. 31 il idi ailəsinin, yaxınlarının gözləri yolda idi...

"Onlar 30 döyüşçü  olublar. Döyüşçülərdən 30 nəfərin cəsədi tapılıb. 7 nəfər, o çümlədən Famil Hüseynov itkin düşmüş sayılıb, onların cəsədi tapılmayıb. İndi məlum olub ki Famil Hüseynov sözügedən döyüşlər zamanı düşmən əsgərlərinin olduğu çadıra yaxınlaşıb özünü və erməni əsgərləri partladaraq qəhrəmancasına şəhid olub".

Xatırladaq ki, Famil Ağaverdi oğlu Hüseynov 1974-cü ildə Lənkəran rayonunun Mamusta kəndində anadan olub. Yaşma qəsəbəsindəki hərbi hissədə xidmət edib...