Ötən ay 78 mindən çox avtomobil icbari sığortalanıb

Bu ilin iyun ayı ərzində İcbari Sığorta Bürosunun (İSB) informasiya sistemində avtonəqliyyat vasitəsi sahiblərinin mülki məsuliyyətinin icbari sığortası üzrə 78,396 müqavilə qeydiyyata alınıb. Avtosfer.az xəbər verir ki, bu barədə İSB-dən verilən məlumata görə, bunların 13,769-u xarici ölkədə qeydiyyata alınmış və ölkəyə tranzit məqsədilə daxil olan avtonəqliyyat vasitələri olub. Qeyd olunan dövrdə bağlanmış icbari sığorta müqavilələri üzrə daxil olan sığorta haqlarının məbləği isə 6,3 milyon manat təşkil edibr. Ötən ilin müvafiq dövrü ilə müqayisədə sığorta müqavilələrinin sayında 13%, sığorta haqlarının məbləğində isə 25% artım müşahidə edilib.

2015-ci ilin yanvar-iyun ayları ərzində avtonəqliyyat vasitəsi sahiblərinin mülki məsuliyyətinin icbari sığortası üzrə 476 minə yaxın sığorta müqaviləsi bağlanıb və bu müqavilələr üzrə sığorta haqları 36,4 milyon manat təşkil edib. Ötən ilin müvafiq dövrü ilə müqayisədə sığorta müqavilələrinin sayında 14%, sığorta haqlarının məbləğində isə 20% artım müşahidə olunub.