“Piyada vurulmalarında günahı təkcə piyadada görmək düzgün deyil” – AYNA rəsmisi

"Piyadalar və velosipedçilərə münasibətdə infrastruktur layihələrinə önəm verilir və bu mərhələdə Təbriz küçəsində pilot layihə həyata keçirilir"

Avtosfer.az xəbər verir ki, bunu Azərbaycan Yerüstü Nəqliyyat Agentliyinin (AYNA) Bakı Regional İdarəsinin rəhbəri Tərlan Səfərov “Yol-nəqliyyat hadisələrinin təsnifatı: səbəb və nəticələrin təhlili” adlı layihə çərçivəsində keçirilən ictimai müzakirədə deyib.

O, bildirib ki, ictimai avtobus parkının yenilənməsi ilə yanaşı bəzi küçələrin piyadalaşdırılır:

"İslam Səfərli küçəsi passiv parklanma yeri kimi istifadə olunur. Həmin küçə Bakıda ən çox tarixi binaların olduğu küçədir. Məqsəd bu küçəni əsasən piyadalaşdırmaqdır. Amma tranzit küçə kimi də yol saxlanılacaq",

Qurum rəsmisi qeyd edib ki, piyada vurulması ilə nəticələnən yol-nəqliyyat hadisələrində piyada günahkar kimi göstərilir:

"Bu düzgün, ədalətli yanaşma deyil. Baxmaq lazımdır ki, piyadanı bu addımı atmağa nə vadar edib".